臺中市立五權國中本土語言網站

捱對客家諺語个體會

有人說：「語言係有聲个文化，文化係無聲个語言。」好个文化个發揚、傳承係非常重要个，就像恩个老祖先傳承下來个硬頸精神、諺語，到現下還深深影響恩客家族群。

「有油莫點雙盞火，免得無油打暗摸」：恩个老祖先唐山過台灣个時節，麼該就沒，有該係殺猛、勤儉、打拼、不認輸个硬頸精神，過个係咬薑啜醋、省吃有春省著有新个省儉生活，才做得撐起一個家庭，這句諺語充分反映生活个艱辛，不過，現下社會生活較好過，當多人煞變到異浪費，捱就用這句諺語來叮嚀自家愛知福惜福不好浪費。

「寧賣祖宗田，莫忘祖宗言；寧賣祖宗坑，莫忘祖宗聲」：人講「食米飯拜田頭，食果子拜樹頭」，這係一種不忘本飲水思源个精神。好个文化一定愛留傳下去，後代个人才有學習个典範，靠該就係語言，不過，時代愈進步，恩客家話愈流失，後生人不肯講不肯學客話，給人異愁慮，好在異多个團體舉辦了當多个客家活動，像山歌比賽、天穿日活動、也係學校个客語社團等等，來給恩有接觸有學習客家話个機會。希望恩大家莫忘祖宗言，不忘本就係恩尊重老祖先該表現。

「清明前好蒔田，清明後好種豆」這係提醒恩愛把握時間、順應天時節氣，愛煞猛不好揇施，打田蒔禾有厥節氣，係無照時間行，該收成就不會好，這乜教恩做事情一定愛照規矩來。再來，乜教恩養生觀念，耕種照節氣行就做得吃到季節菜，身體才會健康。雖然現下的節氣天時改變異多，不過老祖先傳下來敬天愛地、尊重自然个謙虛精神，非常值得恩學習。

從這兜祖先留傳下來个生活樣貌來看，這兜諺語就係經過生活鍛練所錘鍊出來个思想觀念，係當珍貴个文化特色，給捱體會當多。

多元有創意个想法：從食衣住行到學習做人；從養生到尊重自然；從省儉到敬天愛地等等，全部就係從平常生活出發，生活中堵到不如意沒辦法解決个，需要信心、鼓勵、安慰个時節，輒輒會有天外飛來一筆，給人有會心一笑，異實用乜異生趣个想法來化解，像敢去就一擔柴，不敢去就屋下愁，去也不去，意思就當清楚了。

從人文精神出發：因為經歷了生活該艱辛，有个食水愛念水源頭不忘本精神、體會到一粥一飯得來不易，乜有該知足惜福的心，更加有手心向下係助人个同情心，「人情留一線，日後好相見」用禮對人不失禮个忍讓之心，生活當中處處就看的到這種精神个發揮。

總講，客家諺語係人類對生活經驗个體會，係段練出來个人生智慧，係帶領恩前進个力量，係當珍貴該文化，一定愛代代相傳並發揚出去。